TEXNIKAVIY MAGNIY SULFAT

O‘zMSt 201:2024 (TIF TN kodi 283 321 0000)

     Texnikaviy magniy sulfat – bu tarkibida 15% dan yuqori magniy va 12% dan kam bo‘lmagan oltingugurt mavjud bo‘lgan samarali magniyli o‘g‘itdir.  Suvda eriydi, yopishib qolmaydi, tuproqda yaxshi taqsimlanadi. Magniy o’simliklarni tuproqdan fosforni olishini va o‘simliklar tomonidan uning o‘zlashtirilishini yaxshilaydi. Tuproqda magniyning yetishmasligi, barglarni marmar tusga kirishini va o‘simliklarda xlorozni keltirib chiqaradi. Bunday hollarda magniy o‘g‘itini qo‘llash zarur.

        Magniy sulfat meva va sabzavotlarning hosildorligini oshiradi, ularning sifatini, ya’ni kartoshkaning serkraxmalliligi, meva va sabzavotlarni servitaminliligini oshiradi.

Magniyning o‘simliklarga ta’siri

Magniy o‘simliklar uchun eng muhim oziqlantiruvchi moddalar tarkibiga kiradi. Shuning uchun o‘simliklarning o‘sish davrida to‘g‘ri oziqlantirish juda muhim. Azot, fosfor va kaliydan keyin o‘simliklar uchun magniy muhim  hisoblanadi, u xlorofill hosil bo‘lishi uchun zarur. Magniysiz  o‘simlik  fotosintezni bajara olmaydi. Magniy tabiiy ravishda bog‘ tuprog‘ida mavjud. O‘rtacha og‘ir va og‘ir tuproqlarga qaraganda yengil, qumli va kislotali tuproqda kamroq bo‘ladi. Shunday qilib yengil  va kislotali tuproqlarda magniy ko‘pincha yetarli emas. Bundan tashqari yog‘ingarchilik va sug‘orish har yili 1 m² bog‘ tuprog‘idan tahminan 4 grammdan 8 grammgacha magniyni olib tashlaydi. O‘sish jarayonida va quruq davrda o‘simliklarning magniyga bo‘lgan ehtiyoji eng yuqori hisoblanadi.

Magniy makroelementi ayniqsa quyidagi o‘simliklarga mos keladi:

-          Don va boshoqli ekinlar;

-          Kartoshka;

-          Soya va boshqa dukkaklilar;

-          Sabzavot ekinlari;

-          Mevali daraxtlar.

O‘simliklarda magniy yetishmovchiligi belgilari quyidagilar:

-          Barglarning yuzasida quyuq jigarrang tusdagi dog‘lar paydo bo‘ladi.

-          Qisqa vaqt ichida o‘simliklarning pastki barglari sariq rangga ega bo‘ladi.

-          Eski barglar naychaga o‘raladi va to‘kiladi.

Oltingugurtning o‘simliklarga ta‘siri

            Oltingugurt o‘simliklar hayotida muhim o‘rin tutadi. Uning asosiy qismi o‘simlik oqsillarida mavjud: aminokislotalar va organik birlashmalar - fermentlar, vitaminlar, yog‘lar tarkibiga kiradi. Oltingugurt o‘simliklardagi azot va uglevodlar almashinuvida, nafas olish va yog‘larni sintez qilishda ishtirok etadi.

Oltingugurt mahsulotning sifatiga ijobiy ta’sir ko‘rsatadi - bug‘doydagi kleykovina foizining ortishiga ko‘mak bo‘ladi, kungaboqar va soyadagi yog‘ miqdorini ko‘paytiradi.

           Oltingugurt tanqisligi. O‘simliklarning o‘sishi va rivojlanishi yomonlashib, uzun shoxlarda mayda, och sariq tusli barglar hosil bo‘ladi. Bug‘doydagi tajribalardan ma’lumki, vegitatsiya davridagi oltingugurt tanqisligi fotosintezning kamayishi, hosildorlik va don sifati kamayishini keltirib chiqaradi.

Xavfsizlik talablari: mahsulot zaharli emas, yong‘in va portlash xavfi yo’q. Inson organizmiga ta’sir etish darajasi bo‘yicha xavflilikning 4-sinfiga kiradi. O‘g‘it bilan foydalanganda shaxsiy himoya choralariga va shaxsiy gigiena qoidalariga rioya qilish zarur.

Joylash: 100 g, 500 g polietilen paketlarga va 25 kg qoplarga joylashtiriladi.

Tashish: magniy sulfat saqlanishini ta’minlaydigan transportning barcha turlarida, transportning ushbu turiga amal qiladigan yuklarni tashish qoidalariga muvofiq tashiladi.

Saqlash: o‘g‘it namlikdan, ifloslanishdan  va mexanik shikastlanishdan himoyalangan yopiq, quruq omborxonalarda, tekis, qattiq tagliklarda o‘rnatilgan va taxlangan holda transport idishida  saqlanadi. Taxlangan idishlarning balandligi – uch qavatdan ortiq emas.

Ishlab chiqaruvchi kafolatlari: ishlab chiqaruvchi O‘zMSt 201:2024 milliy standartida belgilangan saqlash va tashish qoidalariga rioya etilganda O‘zMSt 201:2024 milliy standartining talablariga mazkur mahsulotning muvofiqligini kafolatlaydi.

Yaroqlilik muddati: cheklanmagan.